Dr. Thoma Dardeli lindi në Muzinë, Sarandë më 1932. Shkollën fillore e mbaroi në fshatin e lindjes ndërsa tetëvjeçaren dhe shkollën e mesme mjekësore në Tiranë. Ka kryer studimet e larta për mjekësi në Budapest-Hungari me rezultate të shkëlqyera në 1951- 1956.

Ka marre pjesë aktive në Revolucionin Antikomunist Hungarez 1956. Në fillimin e dhjetorit 1956 kthehet në Shqipëri bashkë me studentët që ishin në Hungari dhe ishte nën mbikqyrjen e organeve to Sigurimit. Për pasojë arrestohet dhe dënohet me 18 vjet burg, me punë të detyrueshme duke kryer 11 vite.

Kalvari i vuajtejeve të tij nuk ka të sosur, kudo që shkonte vëzhgohej nga Sigurimi. Dërgohet si mjek në zona të thella të vendit si në Fushë-Arrëz, Terpan, Buz, Dukagjin,Vig -Mnelë etj. Sigurimi sajonte akuza nga më të ndryshmet në vizitat që bënte tek familjet e sëmura, ku akuzohej se kishte marrësi rushfet një lekurë delëje (post) apo i kishin mbytur një pulë.

Në korrik 1981 e demaskojnë para popullit në fshatin Vig- Mnelë. Akuza ishte si pjesëmarrës në Revolucionin Antikomunist Hungarez me 23 tetor 1956. Ishte ky shqiptari me bluzë të bardhë që ndihmoi demostruesit që ishin plagosur dhe tërheqjen zvarrë të monumentit të Stalinit para radios, rruga”Brody Shandor” nr.5 në Budapest.

Në korrik 1991 ka themeluar në Shkodër Shoqatën e Miqësisë Shqipëri- Hungari. Me inisiativën e tij e miratimin e Këshillit Bashkiak Shkodër ka marrë emrin “Revolucioni Antikomunist Hungarez” rruga pranë Stacionit të Trenit. Ishte antar i dy shoqatave antikomuniste hungareze.

Në shtatorin e vitit 2007, përfitova një vizë një javore nga Ambasada Hungareze si gazetar i TV Rozafa ku përgatita një dokumentar. Ishte një udhëtim i vështirë pa përkrahje finaciare, ku doktori udhëtonte në tren me tre ditë se linja e avionëve ishte e papërballueshne. Ishin miqtë hungarezë që na hapnin dyert gjatë ditëve të qëndrimit, ku u njoha me universitetin miqtë dhe ngjarjet historike.

Me 23 tetor 2006 me rastin e përvjetorit të Revolucionit Antikomunist Hungarez është dekoruar nga Presidenti i Hungarisë me medaljen”Hero i Lirisë”. Gjatë viteve të demokracisë Dr. Dardeli nuk ndali aktivitetin e tij për të krijuar lidhje miqësie mes Shkodrës e Hungarisë.

Punoi për zhvillimin e turizmit, grupeve artistike e ndihmat që ju afronte personave për vizita të specializuara në Hungari. Jetoi për shumë vite në Shkodër, duke jetuar tek Shtepia e Pionierit dhe më vonë tek Rruga e Kavajës në Tiranë. Botoi librin “Revolucioni Antikomunist Hungarez 1956”, Tirane 2015. Punoi dhe bëri gati për botim fjalorin shqip- hungarisht.